یالان دسن بویر یالان 

یاشاییشدا اولار تالان 

اینانمازلار سنه بیرده  

سننن سونرا کوتو قالان

توپراخ آغلار یل آغلار 

یاغیش داشار سل آغلار 

حق یولوندا اولنه 

اوت سو آغلار ائل آغلار 

عزیزینم بیرده گول 

سن عزیزسن بیرده گول 

گولسن کونلوم گولر 

اولسم گوروم بیرده گول 

اوخور بولبول گولور گول 

اوینور سونبول گولور گول 

یار یارینان گوروشسه 

گولور دوداخ گولور گول 

یازیلمیش: یاییلان گون

تاپدالاندی تالاندی 

درد توپلاندی قاللاندی 

توپراخ سورولدی یاندی 

آرزولاریم جالاندی 

سومک یولی دالاندی 

درده بوللی سالاندی 

ایرییه یوخ دوزه گئت 

دونیا دولی یالاندی 

کونولومده نالاندی 

بو درد مننن قالاندی 

هارا گئتسن گوررسن 

ایرینی دوز آلاندی 

عزیزینم درد آغلار 

گولر دونیا فرد آغلار 

ایگیت بختی باغلانسا 

یر گوی آغلار مرد آغلار  

 یازیلمیش:آغلار گولر (فروردین)آیینین ایرمی ایکینجی  گونی ۱۳۹۲ -                                        می آیینین ایرمیبیرینجی گونی ۲۰۱۳

 بیر بایاتی ائلینه 

ائلینیمدی ائلیمدی 

ساچلاریمدی تئلیمدی 

یازین ایسدی چاغیندا 

نسیمیمدی یلیمدی

بایرام گلدی یل گلدی

یاغیش گلدی سل گلدی

بویوکلری گورمیه

الین گلدی ال گلدی